ສາລະວັນ ອົບຮົມການເມືອງ-ແນວຄິດ ໃຫ້ຄະນະນໍາ, ສະມາຊິກກຳມະບານ ທີ່ສັງກັດຢູ່ຮາກຖານພະແນກການ, ອົງການທຽບເທົ່າ ອ້ອມຂ້າງແຂວງ.

ລາຍລະອຽດ

ສ້າງຂື້ນເມື່ອ ວັນພະຫັດ, 12 ຕຸລາ 2023 06:58

ຂຽນໂດຍ ຄອຂ ສາລະວັນ

ຊຸດອົບຮົມການເມືອງ-ແນວຄິດ ໃຫ້ແກ່ຄະນະນໍາ, ສະມາຊິກກຳມະບານ ໄດ້ຈັດຂື້ນໃນວັນທີ 12 ຕຸລາ 2023 ທີ່ສະໂມສອນໃຫຍ່ ຂອງແຂວງສາລະວັນ ໂດຍການເປັນປະທານ ຂອງທ່ານ ຈັນສະຫມອນ ພົມະແສງ ຄະນະປະຈໍາພັກແຂວງ, ຫົວຫນ້າໂຄສະນາອົບຮົມແຂວງສາລະວັນ, ມີທ່ານ ຄະນະນໍາ ຈາກຄະນະບໍລິຫານງານສະຫະພັນກຳມະບານແຂວງ, ຄະນະນໍາຈາກພະແນກແຮງງານ ແລະ ສະຫວັດດີການ-ສັງຄົມແຂວງ ມີບັນດາທ່ານ ກຳມະການ ຄະນະບໍລິຫານງານສະຫະພັນກຳມະບານແຂວງ, ສະມາຊິກກໍາມະບານ ທີ່ສັງກັດຢູ່ຮາກຖານພະແນກການ, ອົງການທຽບເທົ່າ ອ້ອມຂ້າງແຂວງ, ເຂົ້າຮ່ວມ.

ໃນຊຸດອົບຮົມ ທ່ານ ຈັນສະຫມອນ ພົມມະແສງ ຄະນະປະຈໍາພັກແຂວງ, ຫົວຫນ້າໂຄສະນາອົບຮົມແຂວງສາລະວັນ ກໍ່ໄດ້ໃຫ້ກຽດກ່າວເປີດພິທີ ເຊິ່ງທ່ານ ໃຫ້ຮູ້ວ່າ: ຈຸດປະສົງໃນການອົບຮົມຄັ້ງນີ້ ແມ່ນເພື່ອຈັດຕັ້ງຜັນຂະຫຍາຍເນື້ອໃນຈິດໃຈມະຕິກອງປະຊຸມໃຫ່ຍຄັ້ງທີ XI ຂອງສູນກາງພັກ ກໍຄືມະຕິ 9 ຂອງອົງຄະນະພັກແຂວງ ໃຫ້ເຂົ້າສູ່ຊີວິດຕົວຈິງ ແລະ ທັງນີ້ກໍເພື່ອ ເປັນການສຶກສາອົບຮົມໃຫ້ແກ່ເຝົ້າຫມາຍຕ່າງໆ ເວົ້າລວມ, ເວົ້າສະເພາະ ແມ່ນສືກສາອົບຮົມການເມືອງ-ແນວຄິດ ໃຫ້ແກ່ຖັນແຖວສະມາຊິກກໍາມະບານ; ເພື່ອເຮັດໃຫ້ສະມາຊິກກຳມະບານ ມີຄວາມຮັບຮູ້-ເຂົ້າໃຈ ກ່ຽວກັບມູນເຊື້ອຂອງຊາດລາວ, ມູນເຊື້ອຂອງສະຫະພັນກໍາມະບານລາວ; ຮັບຮູ້ເຂົ້າໃຈກ່ຽວກັບລັກສະນະ, ຖານະ ແລະ ທາດແທ້ ຂອງຊົນຊັ້ນກຳມະກອນ; ຮັບຮູ້ກົດໝາຍ ວ່າດ້ວຍ ແຮງງານ ເພື່ອເປັນການປັບປຸງທັດສະນະຫຼັກໝັ້ນ ຂອງສະມາຊິກກຳມະບານ ໃຫ້ມີຄວາມໜັກ ແໜ້ນ, ເຂັ້ມແຂງ ສາມາດເຮັດຫຼ້ອນໜ້າທີ່ ປະກອບສ່ວນຢ່າງຕັ້ງໜ້າ ເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ; ເພື່ອຍົກລະດັບ, ຄວາມຮູ້, ຄວາມສາມາດ ໃຫ້ແກ່ສະມາຊິກກຳມະບານ ຢູ່ບັນດາພະແນກການຂອງແຂວງ ກໍາແໜ້ນດ້ານທິດສະດີ, ມີຄຸນທາດຫລັກໝັ້ນການເມືອງໜັກແໜ້ນ. ຫົວຂໍ້ທີ່ຈະນໍາມາອົມຮົມໃນຄັ້ງນີ້ມີຄື: 1. ເສີມຂະຫຍາຍມູນເຊື້ອຂອງຊາດລາວ ແລະ ການຝຶກຝົນຫຼໍ່ຫຼອມຄຸນສົມບັດ ແລະ ຄວາມສາມາດຂອງກຳມະກອນລາວ ໃນໄລຍະ ໃໝ່; ລັກສະນະ, ຖານະ ແລະ ທາດແທ້ ຂອງຊົນຊັ້ນກຳມະກອນ; ການພັດທະນາສືມືແຮງງານ ແລະ ຄວາມຮູ້ພື້ນຖານກ່ຽວກັບກົດໝາຍວ່າດ້ວຍແຮງງານ ແລະ ແຈ້ງການ. ຊຸດຝຶກອົບຮົມຄັ້ງນີ້ ແມ່ນດໍາເນີນໄປເປັນເວລາ 1 ຄາບ ມີຄູຝຶກທັງໝົດ 4 ທ່ານ, ຍິງ 1 ທ່ານ; ມາຈາກ ຄະນະໂຄສະນາອົບຮົມແຂວງ 1 ທ່ານ ແລະ ຈາກຄະນະບໍລິຫານງານສະຫະພັນກຳມະບານແຂວງ 2 ທ່ານ ແລະ ມາຈາກພະແນກແຮງງານ ແລະ ສະຫວັດດີການ-ສັງຄົມແຂວງ 1 ທ່ານ. ເຊິງມີຜູ້ເຂົ້າຮ່ວມທັງຫມົດ 186 ຄົນ, ຍິງ 66 ຄົນ.

ໃນຕອນທ້າຍ ທ່ານ ຈັນສະຫມອນ ພົມະແສງ ຄະນະປະຈໍາພັກແຂວງ, ຫົວຫນ້າໂຄສະນາອົບຮົມແຂວງສາລະວັນ ກໍໄດ້ໃຫ້ກຽດໂອ້ລົມ ເຊິ່ງທ່ານ ໄດ້ກ່າວວ່າ:

1. ຕ້ອງເພີ່ມທະວີການຊີ້ນໍາ-ນໍາພາໃນການສຶກສາອົບຮົມການເມືອງ-ແນວຄິດ ໃຫ້ແກ່ຄະນະບໍລິຫານງານສະຫະພັນກຳມະບານໃນແຕ່ລະຂັ້ນ, ສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານລາວທົ່ວແຂວງສາລະວັນ ດ້ວຍຫຼາຍຮູບການ, ຫຼາຍວິທີ ແລະ ຫຼາຍລະດັບ.

2. ຕ້ອງຄະນະບໍລິຫານງານສະຫະພັນກໍາມະບານແຕ່ລຂັ້ນ ຕ້ອງຕັ້ງໜ້າຄົ້ນຄວ້າຮໍ່າຮຽນທິດສະດີມາກ-ເລນິນ, ແນວຄິດ ໄກສອນ ພົມວິຫານ, ແນວທາງແຜນນະໂຍບາຍ, ກົດລະບຽບພັກ, ກົດໝາຍ ແລະ ລະບຽບການຂອງລັດ; ຍົກລະດັບການສຶກສາ, ວິຊາສະເພາະ, ວິທະຍາສາດ-ເຕັກນິກ ແລະ ພາສາຕ່າງປະເທດ.

3. ສະມາຊິກກຳມະບານ, ກຳມະກອນ ແລະ ຊາວຜູ້ອອກແຮງງານລາວ ຕ້ອງຕັ້ງໜ້າປະຕິບັດັ້ໜ້າທີ່ຂອງຕົນດ້ວຍຄວາມຮັບຜິດຊອບສູງ.

4. ເອົາໃຈໃສ່ໃນການອະນຸລັກຮັກສາຂະນົບທຳນຽມ ຮີດຄອງປະເພນີອັນດີງາມ ຂອງຊາດ ແລະ ອະນຸລັກສົ່ງເສີມວັດທະນະທຳທີ່ເປັນມູນເຊື້ອເປັນຕົ້ນແມ່ນວັດທະນະທຳການນຸ່ງຖື ແລະ ອື່ນໆ.

5. ສະມາຊິກກໍາມະບານ, ກໍຄືກໍາມະກອນ, ຊາວຜູ້ອອກແຮງງານລາວ ຕ້ອງພ້ອມກັນຈັດຕັ້ງປະຕິບັດ ຂໍ້ແຂ່ງຂັນ 5 ເປັນເຈົ້າຂອງສະຫະພັນກຳມະບານລາວ ໃຫ້ເປັນຂະບວນຟົດຟື້ນ.

• < ຕໍ່ໄປ
• ຕໍ່ໄປ >