ໃນຕອນເຊົ້າ ວັນທີ 21 ມີນາ 2024, ບັນດາການນຳພັກ-ລັດ ແຂວງສາລະວັນ, ນຳໂດຍ ສະຫາຍ ປອ ດາວວົງ ພອນແກ້ວ ກໍາມະການສູນກາງພັກ, ເລຂາພັກ-ເຈົ້າແຂວງໆສາລະວັນ ໄດ້ເຂົ້າວາງກະຕາດອກໄມ້ ເນື່ອງໃນໂອກາດ ວັນສ້າງຕັ້ງພັກ ປະຊາຊົນປະຕິວັດລາວ ຄົບຮອບ 69 ປີ (22 ມີນາ 1955 – 22 ມີນາ 2024) ຢູ່ທີ່ອະນຸສອນສະຖານ ໄກສອນ ພົມວິຫານ ອະດີດຜູ້ນໍາ ທີ່ແສນເຄົາລົບຮັກ ຂອງປວງຊົນລາວທັງຊາດ ເພື່ອສະແດງຄວາມກະຕັນຍູຮູ້ບຸນຄຸນ ທີ່ໄດ້ສຸມສະຕິປັນຍາ ເຂົ້າໃນການນຳພາຂະບວນການຕໍ່ສູ້ ຕ້ານການຮຸກຮານຂອງພວກຕ່າງດ້າວ ສາມາດຍາດໄດ້ໄຊຊະນະ ແລະ ນຳເອົາຄວາມຢູ່ເຢັນເປັນສຸກມາສູ່ປະຊາຊົນລາວບັນດາເຜົ່າ
ພາຍຫຼັງສໍາເລັດວາງກະຕາດອກໄມ້ແລ້ວ ກໍ່ໄດ້ສືບຕໍ່ພວງມາລາ ຢູ່ອານຸສາວະລີ ນັກຮົບນິລະນາມ (ສະໜາມແດງ) ແລະ ວາງພວງມາລາ ຢູ່ທີ່ອະນຸສອນສະຖານ ອົງແກ້ວ ກ່ອນມີພັກນໍາພາ, ການວາງກະຕາດອກໄມ້ ແລະ ການວາງພວງມາລາໃນຄັ້ງນີ້, ເປັນການສະແດງຄວາມເຄົາລົບຮັກ, ຄວາມກະຕັນຍູຮູ້ບຸນຄຸນເຖິງຄຸນງາມຄວາມດີ, ນໍ້າໃຈຕໍ່ສູ້ຢ່າງພິລະອາດຫານ ແລະ ບໍ່ຍອມຈໍານົນຂອງບັນພະບູລຸດລາວ ທີ່ໄດ້ເສຍສະຫລະຊີວິດ, ເລືອດເນື້ອ ເພື່ອພາລະກິດປະຕິວັດຢ່າງອົງອາດກ້າຫານ ພາຍໃຕ້ການຊີ້ນຳ-ນຳພາ ຂອງພັກປະຊາຊົນ ປະຕິວັດລາວ ຈົນສາມາດຍາດໄດ້ໄຊຊະນະອັນໃຫຍ່ຫລວງ ແລະ ປະກາດເອກະລາດ, ສະຖາປະນາ ເປັນສາທາລະນະລັດ ປະຊາ ທິປະໄຕ ປະຊາຊົນລາວ ຂຶ້ນຢ່າງສະຫງ່າຜ່າເຜີຍ ໃນວັນທີ 2 ທັນວາ 1975.
