ຄະນະພັກຮາກຖານ ທະນາຄານສາຂາແຂວງສາລະວັນ ສຳເລັດກອງປະຊຸມໃຫຍ່ ຄັ້ງທີ I ພ້ອມທັງເລືອກຄະນະຊຸດໃໝ່
ກອງປະຊຸມໃຫຍ່ ສະມາຊິກພັກ ຄະນະພັກຮາກຖານທະນາຄານ ສາຂາແຂວງສາລະວັນ ຄັ້ງທີ I, ໄດ້ຈັດຂຶ້ນໃນວັນທີ 1 ເມສາ 2025, ທີ່ຫ້ອງປະຊຸມ ຂອງທະນາຄານການຄ້າຕ່າງປະເທດລາວ ມະຫາຊົນ ສາຂາແຂວງສາລະວັນ, ໂດຍການເປັນປະທານຂອງ ສະຫາຍ ຄໍາແພງ ກຸມພົນພັກດີ ເລຂາຄະນະພັກຮາກຖານ ທະນາຄານສາຂາແຂວງສາລະວັນ, ຫົວໜ້າທະນາຄານການຄ້າຕ່າງປະເທດລາວ ມະຫາຊົນສາຂາແຂວງສາລະວັນ, ໃຫ້ກຽດເຂົ້າຮ່ວມຂອງ ສະຫາຍ ຈັນສະໝອນ ພົມມະແສງ ຄະນະປະຈໍາພັກແຂວງ, ຫົວໜ້າຄະນະໂຄສະນາອົບຮົມແຂວງ, ສະຫາຍ ສຸກສະເຫຼີມພອນ ໄມມະນີ ຮອງເລຂາໜ່ວຍພັກ,ຮອງຫົວໜ້າຄະນະຈັດຕັ້ງແຂວງ,ມີສະຫາຍຮອງເລຂາ, ຄະນະພັກຮາກຖານ, ເລຂາໜ່ວຍພັກ-ຮອງເລຂາໜ່ວຍພັກ ທັງ 4 ໜ່ວຍພັກຄື: ໜ່ວຍພັກທະນາຄານການຄ້າຕ່າງປະເທດລາວ ມະຫາຊົນ ສາຂາສາລະວັນ, ໜ່ວຍພັກ ທະນາຄານສົ່ງເສີມກະສິກຳ ຈໍາກັດ ສາຂາສາລະວັນ, ໜ່ວຍພັກ ທະນາຄານພັດທະນາລາວ ສາຂາສາລະວັນ, ໜ່ວຍພັກ ຫ້ອງການປະສານງານ ທະນາຄານນະໂຍບາຍ ແຂວງສາລະວັນ ພ້ອມດ້ວຍ ສະມາຊິກພັກສົມບູນ ແລະ ແຂກທີ່ຖືກເຊີນຈາກພາກສ່ວນທີ່ກ່ຽວຂ້ອງເຂົ້າຮ່ວມ.
ໃນກອງປະຊຸມ ໄດ້ຮັບຟັງການຜ່ານຮ່າງລາຍງານການເມືອງ ເຊິ່ງມີຜົນສໍາເລັດຫຼາຍດ້ານຄື: ວຽກການເມືອງ ຄະນະພັກຮາກຖານ ຖືເອົາວຽກງານການເມືອງ-ແນວຄິດເປັນວຽກງານກົກ, ເປັນວຽກງານບູລິມະສິດອັນສຳຄັນລຳດັບໜຶ່ງ ໃນການຈັດຕັ້ງ ແລະ ການເຄື່ອນໄຫວນຳພາ ຂອງຕົນ ແລະ ໄດ້ນໍາພາ-ຊີ້ນຳການຈັດຕັ້ງປະຕິບັດວຽກງານນີ້ຢ່າງເປັນລະບົບ, ປົກກະຕິຕໍ່ເນື່ອງ, ສອດຫ້ອຍເຂົ້າກັບທຸກຂົງເຂດວຽກງານທະນາຄານ. ເປັນພື້ນຖານກວ່າໝູ່ ແມ່ນການສຶກສາອົບຮົມແນວທາງ, ແຜນນະໂຍບາຍ ຂອງພັກ ແລະ ລະບຽບກົດໝາຍ ຂອງລັດ, ສາມາດເວົ້າໄດ້ວ່າ: ມະຕິກອງປະຊຸມໃຫຍ່ ຄັ້ງທີ XI ຂອງພັກ, ບັນດາມະຕິກອງປະຊຸມຄົບຄະນະບໍລິຫານງານພັກແຂວງ ກໍຄືບັນດາເນື້ອໃນເອກະສານສຳຄັນ ຂອງພັກ ແລະ ລັດ ລ້ວນແຕ່ໄດ້ຖືກເຜີຍແຜ່, ຈັດຕັ້ງຄົ້ນຄວ້າເຊື່ອມຊຶມຢ່າງທົ່ວເຖິງ ໃນຖັນແຖວສະມາຊິກພັກ, ພະນັກງານ-ລັດຖະກອນ. ໃນໄລຍະ 5 ປີຜ່ານມານີ້ ໄດ້ຈັດຕັ້ງເຊື່ອມຊຶມບັນດາເອກະສານ ຂອງພັກ-ລັດ ແລະ ປາຖະກະຖາໃນໂອກາດວັນສຳຄັນຕ່າງໆໄດ້ 22 ຄັ້ງ ມີຜູ້ເຂົ້າຮ່ວມທັງໝົດ 220 ເທື່ອຄົນ, ຍິງ 68 ເທື່ອຄົນ. ໃນນັ້ນ ມີສະມາຊິກ ເຂົ້າຮ່ວມທັງໝົດ 67 ເທື່ອຄົນ, ຍິງ 34 ເທື່ອຄົນ; ມີພະນັກງານ-ລັດຖະກອນ ທີ່ບໍ່ແມ່ນສະມາຊິກພັກເຂົ້າທັງໝົດ 47 ເທື່ອຄົນ, ຍິງ 23 ເທື່ອຄົນ. ວຽກແນວຄິດຄະນະພັກໄດ້ນຳພາ-ຊີ້ນຳວຽກນີ້ຢ່າງໃກ້ຊິດ ແລະ ຕໍ່ເນື່ອງ ໃນຖັນແຖວພະນັກງານ-ສະມາຊິກພັກຢູ່ແຕ່ລະບ່ອນບົນພື້ນຖານການປຸກສະຕິຕຶ່ນຕົວ, ເປັນເຈົ້າການໃນຄວາມຮັບຜິດຊອບການເມືອງ ຂອງຕົນ, ຕ້ອງເດັດດ່ຽວແກ້ໄຂຕ້ານທຸກປະກົດການຫຍໍ້ທໍ້ຫຼ້າຫຼັງອື່ນໆ, ທັງນີ້ກໍ່ເພື່ອຍົກສູງຄຸນນະພາບ ແລະ ປະສິດທິຜົນໃນການຈັດຕັ້ງນໍາພາວຽກງານຮອບດ້ານ ແລະ ຜ່ານການເຄື່ອນໄຫວນຳພາການສຶກສາອົບຮົມດ້ານແນວຄິດ ສັງເກດເຫັນວ່າ ພະນັກງານ-ສະມາຊິກພັກ ສ່ວນຫຼວງຫຼາຍ ໄດ້ມີຄວາມຮັບຮູ້, ເຂົ້າໃຈຕໍ່ແນວທາງນະໂຍບາຍ ຂອງພັກ ແລະ ນະໂຍບາຍ ຂອງລັດ ເຂົ້າຮ່ວມທຸກການເຄື່ອນໄຫວປະຕິບັດວຽກງານຕ່າງໆ ໄດ້ມີຜົນສຳເລັດ ຫຼາຍຂຶ້ນກວ່າເກົ່າ ແລະ ວຽກອື່ນໆ ກໍ່ມີຜົນສໍາເລັດ.
ຈາກນັ້ນໃນກອງປະຊຸມ ໄດ້ຜ່ານຮ່າງແຜນພັດທະນາ ແລະ ບົດສໍາຫຼວດການນໍາພາລວມ ຂອງຄະນະພັກຮາກຖານ, ຜ່ານມາດຖານເງື່ອນໄຂຜູ້ສະໝັກເລືອກຕັ້ງຄະນະໜ່ວຍພັກຊຸດໃໝ່, ເຊີ່ງມີຜູ້ສະໝັກທັງໝົດ 7 ສະຫາຍ, ຍິງ 1 ສະຫາຍ ເລືອກເອົາ 5 ສະຫາຍ, ກອງປະຊຸມຄັ້ງປະຖົມມະລຶກ ໄດ້ເຫັນດີເລືອກເອົາ: ສະຫາຍ ຄໍາແພງ ກຸມພົນພັກດີ ເປັນເລຂາຄະນະພັກຮາກຖານ, ສະຫາຍ ພອນປະເສີດ ຈະເລີນພອນ ເປັນຮອງເລຂາຄະນະພັກຮາກຖານ, ສະຫາຍ ບຸນ ອະນຸສັກ, ສະຫາຍ ນາງ ໂສດາ ສຸວັນນາລີ, ສະຫາຍ ເສົາສະຫວາດ ສຸລະມົນ ເປັນຄະນະພັກຮາກຖານຊຸດໃໝ່. ກອງປະຊຸມປະຖົມມະລຶກເຫັນດີເລືອກເອົາສະຫາຍ ບຸນ ອະນຸສັກ ເປັນປະທານກວດກາພັກ, ສະຫາຍ ນາງ ໂສດາ ສຸວັນນາລີ ແລະ ສະຫາຍ ບົວທອງ ສີອໍາພອນ ເປັນຮອງປະທານກວດກາ.
