ຄະນະໂຄສະນາອົບຮົມແຂວງສາລະວັນ ເຂົ້າຮ່ວມຝຶກອົບຮົມການບໍລິຫານຈັດການກະດານຂ່າວເອເລັກໂຕຼນິກ ເວັບໄຊສ ຜ່ານລະບົບກອງປະຊຸມທາງໄກ.

ຄະນະໂຄສະນາອົບຮົມແຂວງສາລະວັນ ເຂົ້າຮ່ວມຝຶກອົບຮົມການບໍລິຫານຈັດການກະດານຂ່າວເອເລັກໂຕຼນິກ ເວັບໄຊສ ຜ່ານລະບົບກອງປະຊຸມທາງໄກ.

ໃນລະຫວ່າງວັນທີ 17 – 18 ມິຖຸນາ 2024 ຄະນະໂຄສະນາອົບຮົມແຂວງສາລະວັນ ໄດ້ເຂົ້າຮ່ວມຝຶກອົບຮົມການບໍລິຫານຈັດການກະດານຂ່າວເອເລັກໂຕຼນິກ ຮ່ວມກັບຄະນະໂຄສະນາອົບຮົມທົ່ວປະເທດ ຜ່ານລະບົບທາງໄກ. ໂດຍການຈັດຂື້ນຂອງຄະນະໂຄສະນາອົບຮົມສູນກາງພັກ ມີບັນດາຄູຝຶກ ຈາກກົມຂໍ້ມູນຂ່າວສານ ແລະ ຝຶກອົບຮົມ, ນັກສໍາມນາກອນ ແອັດມິນຜູ້ຮັບຜິດຊອບເວັບໄຊສ. ສໍາລັບແຂວງສາລະວັນ ມີຕາງໜ້າຂະແໜງສັງລວມຫາງສຽງສັງຄົມ ແລະ ຂໍ້ມູນຂ່າວສານ ເຂົ້າຮ່ວມ.

ຈຸດປະສົງໃນການຝຶກອົບຮົມຄັ້ງນີ້, ແມ່ນເພື່ອເຮັດໃຫ້ພະນັກງານທີ່ຮັບຜິດຊອບວຽກງານສື່ເອເລັກໂຕຼນິກບັນດາແຂວງໃນທົ່ວປະເທດ ສາມາດນຳໃຊ້ໄດ້ທາງດ້ານເຕັກນິກ, ການຂຽນບົດ, ການໂພດຮູບພາບ ແລະ ອຶ່ນໆ ຂຶ້ນເວັບໄຊໄດ້ດ້ວຍຕົນເອງ ເພື່ອເປັນກະບອກສຽງໃນການໂຄສະນາການເຄື່ອນໄຫວຂອງບັນດາການນຳຂັ້ນຕ່າງໆຂອງແຂວງ, ເມືອງໃນການເຮັດວຽກງານການເມືອງ-ແນວຄິດ ຂອງພວກເຮົາເພາະຍຸກປັດຈຸບັນການສະໜອງບັນດາຂໍ້ມູນຂ່າວສານຕ້ອງໃຫ້ມີຄວາມວ່ອງໄວ ແລະ ທັນການ.

ສໍາລັບບົດຮຽນທີ່ນຳໃຊ້ໃນບັ້ນຝຶກອົບຮົມຄັ້ງນີ້ ປະກອບມີ 5 ຫົວຂໍ້ໃຫຍ່ຄື: ຫົວຂໍ້ 1: ຂັ້ນຕອນການກະກຽມຮູບພາບໃນການປະກອບບົດຂ່າວ; ຫົວຂໍ້ 2: ຂັ້ນຕອນການສ້າງ ແລະ ເຜີຍແຜ່ບົດຂ່າວ ລົງໃນເວັບໄຊສ; ຫົວຂໍ້ 3: ຂັ້ນຕອນການອັບເດດຂໍ້ມູນ ເອກະສານ ມະຕິຄຳສັ່ງຕ່າງໆ ລົງໃນເມນູ ແລະ ຄໍລຳຕ່າງໆ; ຫົວຂໍ້ 4: ຂັ້ນຕອນການເຜີຍແຜ່ບັນດາຂໍ້ມູນຂ່າວສານຈາກເວັບໄຊສ ໄປຍັງບັນດາສື່ສັງຄົມອອນລາຍ ແລະ ຫົວຂໍ້ 5: ຂັ້ນຕອນການສ້າງ ແລະ ຄຸ້ມຄອງຜູ້ໃຊ້ງານລະບົບ (user).

ບັນຍາກາດໃນການຝຶກອົບຮົມຄັ້ງນີ້, ບັນດາຄູອາຈານໄດ້ຖ່າຍບົດຮຽນຢ່າງເປັນເຈົ້າການ, ແອັດມິນຜູ້ຮັບຜິດຊອບເວັບໄຊສ໌ຂອງບັນດາແຂວງ ໄດ້ເອົາໃຈໃສ່ຍາດແຍ່ງແລກປ່ຽນຄວາມຮູ້ ນໍາຄະນະຮັບຜິດຊອບທາງສູນກາງ ຢ່າງມີບັນຍາກາດຟົດຟື້້ນ.