ຄະນະໂຄສະນາອົບຮົມແຂວງສາລະວັນ ເປີດຮຽນສະໜັບສະໜູນ ໃຫ້ແກ່ມະຫາຊົນຜູ້ທີ່ມີຄວາມກ້າວໜ້າ ເພື່ອຂະຫຍາຍເຂົ້າເປັນສະມາຊິກພັກປະຊາຊົນ ປະຕິວັດລາວ ຊຸດທີ VII
ມາໃນວັນທີ 29 ຕຸລາ 2024, ຄະນະໂຄສະນາອົບຮົມແຂວງສາລະວັນ ໄດ້ເປີດສະຫນັບສະຫນູນ ໃຫ້ແກ່ມະຫາຊົນຜູ້ ທີ່ມີຄວາມກ້າວໜ້າ ຊຸດທີ VII ປະຈໍາປີ 2024 ໃຫ້ແກ່ 3 ຄະນະພັກຮາກຖານ ແລະ 2 ໜ່ວຍພັກຮາກຖານ ຄື: ຄະນະພັກຮາກຖານພະແນກສຶກສາທິການ ແລະ ກິລາແຂວງ, ຄະນະພັກຮາກຖານພະແນກໂຍທາທິການ ແລະ ຂົນສົ່ງແຂວງ, ຄະນະພັກຮາກຖານຫ້ອງວ່າການແຂວງ, ໜ່ວຍພັກຮາກຖານພະແນກການຕ່າງປະເທດ ແລະ ໜ່ວຍພັກຮາກຖານໄຟຟ້າເຊເສັດ 1-2. ພິທີດັ່ງກ່າວ, ໄດ້ຈັດຂື້ນທີ່ຫ້ອງການຄະນະໂຄສະນາອົບຮົມແຂວງ ໂດຍໃຫ້ກຽດເຜີຍແຜ່ເອກະສານ ຂອງສະຫາຍ ນາງ ໜູຄໍາ ສາຍສູນທອນ ຫົວໜ້າຂະແໜງອົບຮົມ ຄະນະໂຄສະນາອົບຮົມແຂວງ ມີບັນດາມະຫາຊົນ ຜູ້ທີ່ມີຄວາມກ້າວຫນ້າ ເຂົ້າຮ່ວມທັງໝົດ ຈໍານວນ 17 ສະຫາຍ, ຍິງ 5 ສະຫາຍ.
ໂອກາດດຽວກັນນີ້, ສະຫາຍ ນາງ ໜູຄໍາ ສາຍສູນທອນ ຫົວໜ້າຂະແໜງອົບຮົມ ໄດ້ບັນຍາຍເນື້ອໃນເອກະສານທີ່ສໍາຄັນຕ່າງໆກ່ຽວກັບພັກ ເປັນຕົ້ນແມ່ນ ເອກະສານອົບຮົມເປົ້າໝາຍຂະຫຍາຍເຂົ້າພັກປະຊາຊົນປະຕິວັດລາວ ປີ 2021 ໃນນັ້ນ, ປະກອບມີ 13 ຄໍາຖາມ-ຄໍາຕອບ. ທັງນີ້, ກໍເພື່ອເຮັດໃຫ້ມະຫາຊົນ ຜູ້ທີ່ມີຄວາມກ້າວໜ້າ ເພື່ອຂະຫຍາຍເຂົ້າເປັນສະມາຊິກພັກ ໄດ້ຮັບຮູ້ເຂົ້າໃຈເບື້ອງຕົ້ນ ກ່ຽວກັບປະຫວັດຄວາມເປັນມາ, ອຸດົມການ ແລະ ທາດແທ້ຂອງພັກປະຊາຊົນປະຕິວັດລາວ ຢ່າງເລິກເຊິ່ງເຖິງຖອງ ແລະ ເນື້ອໃນອື່ນໆ ທີ່ສໍາຄັນ ກ່ຽວກັບພັກປະຊາຊົນປະຕິວັດລາວ ຕື່ມອີກ.
ໃນຕອນທ້າຍ, ສະຫາຍ ນາງ ບຸຜາ ສຸດທິຈັກ ຄະນະພັກ, ຫົວໜ້າຫ້ອງການບໍລິຫານ ຄະນະໂຄສະນາອົບຮົມແຂວງ ກໍ່ໄດ້ໃຫ້ກຽດມີຄໍາເຫັນໂອ້ລົມ ຕໍ່ກັບມະຫາຊົນຜູ້ທີ່ມີຄວາມກ້າວໜ້າ ທ່ານ ກ່າວວ່າ: ມະຫາຊົນທີ່ໄດ້ເຂົ້າມາຮຽນໃນມື້ນີ້ ແມ່ນຜູ້ທີ່ມີຄວາມຕື່ນຕົວ ໃນການຈັດຕັ້ງປະຕິບັດວຽກງານ ຈົນໄດ້ກ້າວມາເປັນມະຫາຊົນ ຜູ້ທີ່ມີຄວາມກ້າວໜ້າ ແລະ ທ່ານ ຍັງເນັ້ນໜັກໃຫ້ມະຫາຊົນ.
- ຕ້ອງເອົາໃຈໃສ່ປະກອບສ່ວນເຂົ້າໃນວຽກງານຂອງພັກ ໃຫ້ມີຄວາມຫ້າວຫັນ.
- ປັບປຸງຕົນເອງ ໃຫ້ກາຍເປັນສະມາຊິກພັກທີ່ດີ.
- ຍົກສູງສະຕິເປັນເຈົ້າການປະຕິບັດຕາມກົດລະບຽບພັກ, ກົດໝາຍຂອງລັດ, ຫັນເອົາແນວທາງຂອງພັກ ທີ່ໄດ້ສຶກສາຄັ້ງນີ້ ນໍາໄປຈັດຕັ້ງຜັນຂະຫຍາຍ ໃຫ້ປະສົບຜົນສຳເລັດໃນຕໍ່ໜ້າ.
ພິທີດັ່ງກ່າວ, ຍັງໄດ້ມອບ-ຮັບໃບຢັ້ງຢືນໃຫ້ແກ່ມະຫາຊົນທີ່ມີຄວາມຫ້າວໜ້າ ທີ່ເຂົ້າຮ່ວມຮຽນ ເຊິ່ງເປັນກຽດມອບ ຂອງສະຫາຍ ນາງ ບຸຜາ ສຸດທິຈັກ ຄະນະພັກ, ຫົວໜ້າຫ້ອງການບໍລິຫານ ຄະນະໂຄສະນາອົບຮົມແຂວງ ຕື່ມອີກ.
