ຄະນະໂຄສະນາອົບຮົມແຂວງສາລະວັນ ເຂົ້າຮ່ວມເຂົ້າຮ່ວມ ຊຸດຝຶກອົບຮົມວິທີການຂຽນບົດຂ່າວ, ບົດຄວາມລົງເຜິຍແຜ່ໃນສື່ເອເລັກໂຕຣນິກ ຮ່ວມກັບຄະນະໂຄສະນາອົບຮົມ ທົ່ວປະເທດ
ໃນຕອນເຊົ້າຂອງ ວັນທີ 4-7 ພະຈິກ 2024 ຄະນະໂຄສະນາອົບຮົມແຂວງສາລະວັນ ໄດ້ເຂົ້າຮ່ວມຊຸດຝຶກອົບຮົມວິທີການຂຽນຂ່າວ, ບົດຄວາມລົງເຜິຍແຜ່ໃນສື່ເອເລັກໂຕຣນິກ ຮ່ວມກັບຄະນະໂຄສະນາອົບຮົມທົ່ວປະເທດ ໂດຍຜ່ານລະບົບກອງປະຊຸມທາງໄກ ໃຫ້ກຽດເຂົ້າຮ່ວມ ແລະ ເປັນປະທານໂດຍ ທ່ານ ນ. ວິລະວອນ ພັນທະວົງ ຄະນະປະຈໍາພັກ ຮອງຫົວໜ້າຄະນະໂຄສະນາອົບຮົມສູນກາງພັກ, ຜູ້ຊີ້ນໍາວຽກງານກົມຂໍ້ມູນຂ່າວສານ ແລະ ຝຶກອົບຮົມ. ເຂົ້າຮ່ວມມີ: ທ່ານ ວັນຕຸລາ ຮັກນຸດ ກໍາມະການຄະນະພັກ ຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ, ທ່ານ ພູວັນ ສຸວັນ ຮອງຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ, ທ່ານ ຄໍາວິສັນ ແກ້ວສຸວັນ ອະດີດຜູ້ຊ່ວຍຫົວໜ້າຄະນະໂຄສະນາອົບຮົມສູນກາງພັກ, ຄະນະຮັບຜິດຊອບຊຸດຝຶກອົບຮົມ ແລະ ບັນດານັກສໍາມະກອນ ຈາກໂຄສະນາອົບຮົມແຂວງ ທົ່ວປະເທດ ຈໍານວນ 134 ສະຫາຍ, ຍິງ 55 ສະຫາຍ. ສໍາລັບຄະນະໂຄສະນາອົບຮົມແຂວງສາລະວັນ ເຂົ້າຮ່ວມ 5 ທ່ານ,ຍິງ 2 ທ່ານ.
ໃນພິທີ ດັ່ງກ່າວ ທ່ານ ນ. ວິລະວອນ ພັນທະວົງ ຄະນະປະຈໍາພັກ ຮອງຫົວໜ້າຄະນະໂຄສະນາອົບຮົມສູນກາງພັກ, ຜູ້ຊີ້ນໍາວຽກງານກົມຂໍ້ມູນຂ່າວສານ ແລະ ຝຶກອົບຮົມ ໄດ້ໃຫ້ກຽດກ່າວເປິດຊຸດຝຶກອົບຮົມ ພ້ອມທັງຮຽກຮ້ອງມາຍັງບັນດາທ່ານທີ່ໄດ້ເຂົ້າຮ່ວມຊຸດຝຶກອົບຮົມຄັ້ງນີ້ ຈົ່ງພ້ອມກັນຍົກສູງຄວາມຮັບຜິດຊອບດ້ວຍຄວາມຫ້າວຫັນ, ເອົາໃຈໃສ່ຄົ້ນຄວ້າຍາດແຍ່ງເອົາຄວາມຮູ້, ແລກປ່ຽນບົດຮຽນນໍາບັນດານັກວິທະຍາກອນຜູ້ທີ່ຊ່ຽວຊານກ່ຽວກັບວິທີການຄົ້ນຄິດ, ວິທີການຂຽນບົດຂ່າວ, ບົດຄວາມເຜີຍແຜ່ຜ່ານສື່ເອເລັກໂຕຣນິກ, ເພື່ອຍົກສູງຄວາມຮູ້ ແລະ ປະສົບການໃນການບໍາລຸງຍົກລະດັບໃຫ້ແກ່ບັນດາສະຫາຍຜູ້ທີ່ເຮັດວຽກຕົວຈິງເພື່ອເປັນບ່ອນອີງ ແລະ ເປັນຄວາມຮູ້ພຶ້ນຖານທີ່ຈະນໍາໄປຫມູນໃຊ້ໃນການຈັດຕັ້ງປະຕິບັດຫນ້າທີ່ວຽກງານວິຊາສະເພາະຕົວຈິງຂອງຕົນ ແລະ ຖ່າຍທອດຄວາມຮູ້, ປະສົບການດັ່ງກ່າວລົງສູ່ບັນດາເມືອງໃຫ້ມີປະສິດທິພາບ ປະສິດທິຜົນສູງ ຕາມເປົ້າໝາຍການຫັນວຽກງານໂຄສະນາອົບຮົມໄປສູ່ຄຸນນະພາບໃໝ່.
ຊຸດ ຝຶກອົບຮົມຄັ້ງນີ້ຈະໄດ້ດໍາເນີນເປັນໄລຍະເວລາ 5 ວັນ ວັນທີ 4-8 ພະຈິກ 2024 ເຊິ່ງບົດຮຽນທັງໝົດປະກອບມີ 3 ບົດຄື:
ບົດທີ 1 ຫົວຂໍ້: ທັກສະການຂຽນຂ່າວແບບມືອາຊີບ ສະເໜີໂດຍ: ທ່ານ ຄໍາວິສັນ ແກ້ວສຸວັນ ອະດີດຜູ້ຊ່ວຍຫົວໜ້າຄະນະໂຄສະນາອົບຮົມສູນກາງພັກ.
ບົດທີ 2 ສະເໜີໂດຍ: ທ່ານ ວັນໄຊ ຕະວິນຍານ ກໍາມະການຄະນະພັກ ຮອງຫົວໜ້າຄະນະໂຄສະນາອົບຮົມສູນກາງພັກ, ຜູ້ບັນນາທິການໃຫຍ່ໜັງສືພິມປະຊາຊົນ.
ບົດທີ 3 ສະເໜີໂດຍ: ທ່ານ ວັນຕຸລາ ຮັກນຸດ ກໍາມະການຄະນະພັກ ຫົວໜ້າກົມຂໍ້ມູນຂ່າວສານ ແລະ ຝຶກອົບຮົມ.
