ແຂວງສາລະວັນ ຈັດພິທີປາຖະກະຖາເລົ່າຄືນມູນເຊື້ອວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນ ຄົບຮອບ 64 ປີ
ຄະນະໂຄສະນາອົບຮົມແຂວງສາລະວັນ ຮ່ວມກັບກອງບັນຊາການ ປກສ ແຂວງສາລະວັນ ຈັດພິທີປາຖະກະຖາເລົ່າຄືນມູນເຊື້ອ ວັນສ້າງຕັ້ງກຳລັງປ້ອງກັນຄວາມສະຫງົບປະຊາຊົນ ຄົບຮອບ 64 ປີ (ວັນທີ 5 ເມສາ 1961 – 5 ເມສາ 2025) ພິທີດັ່ງກ່າວ ໄດ້ຈັດໃນວັນທີ 4 ເມສາ 2025 ຢູ່ທີ່ສະໂມສອນໃຫຍ່ຂອງແຂວງ ໂດຍການໃຫ້ກຽດປາຖະກະຖາຂອງ ທ່ານ ຈັນສະໝອນ ພົມມະແສງ ຄະນະປະຈໍາພັກແຂວງ, ຫົວໜ້າຄະນະໂຄສະນາອົບຮົມແຂວງ, ເປັນກຽດເຂົ້າຮ່ວມ ຂອງທ່ານ ພົ.ວ ສີເສີດ ສອນດາລາ ກໍາມະການພັກແຂວງ, ຫົວໜ້າຫ້ອງບັນຊາການ ປກສ ແຂວງ ມີບັນດາທ່ານ ການນໍາຂອງແຂວງ, ພະນັກງານ-ຫຼັກແຫຼ່ງ, ນາຍ ແລະ ພົນທະຫານ ແລະ ພົນຕໍາຫຼວດ ຕະຫຼອດຮອດພະນັກງານ-ລັດຖະກອນ ເຂົ້າຮ່ວມ.
#ໂອກາດດັ່ງກ່າວ, ທ່ານ ຈັນສະໝອນ ພົມມະແສງ ໄດ້ເລົ່າຄືນການກໍາເນີດເຕີບໃຫຍ່ຂະຫຍາຍຕົວຂອງກໍາລັງປ້ອງກັນຄວາມສະຫງົບ ຕະຫຼອດໄລຍະ 64 ປີ ທີ່ຜ່ານມາ ເຊິ່ງທ່ານ ໃຫ້ຮູ້ວ່າ: ວັນສ້າງຕັ້ງກໍາລັງ ປ້ອງກັນຄວາມສະຫງົບ ເປັນວັນໜື່ງທີ່ສໍາຄັນຢ່າງຍິ່ງຂອງຊາດ-ຂອງພັກ ເວົ້າລວມ-ເວົ້າສະເພາະ ກໍ່ແມ່ນວັນສ້າງຕັ້ງກໍາລັງປ້ອງກັນຄວາມສະຫງົບປະຊາຊົນ ນັບແຕ່ໄດ້ຮັບການສ້າງຕັ້ງຂຶ້ນ, ກຳລັງປ້ອງກັນຄວາມສະຫງົບ ແມ່ນໄດ້ປະກອບສ່ວນຜົນງານຢ່າງໃຫຍ່ຫຼວງໃນພາລະກິດປົດປ່ອຍຊາດ, ເປັນກຳລັງປະຈັນບານປະເຊີນໜ້າໂດຍກົງ, ເປັນກຳລັງທີ່ມີມູນເຊື້ອກໍ່ສ້າງຮາກຖານການເມືອງ ຕິດພັນ ແລະ ສະໜິດແໜ້ນກັບປະຊາຊົນ, ປ້ອງກັນຜູ້ນຳພັກ-ລັດ ຢ່າງເດັດດ່ຽວ ນາຍ ແລະ ພົນຕຳຫຼວດທຸກຮຸ້ນ ໃນແຕ່ລະໄລຍະໄດ້ກາຍເປັນກໍາລັງທີ່ຈົ່ງຮັກພັກດີ ຕໍ່ປະເທດຊາດ ແລະ ປະຊາຊົນບັນດາເຜົ່າ, ເປັນກຳລັງ ທີ່ຢູ່ໃຕ້ການຊີ້ນຳ-ນໍາພາຢ່າງເດັດຂາດ, ໂດຍກົງ, ຮອບດ້ານຂອງພັກປະຊາຊົນ ປະຕິວັດລາວ ທີ່ມີກຽດສະຫງ່າງາມ, ໄດ້ອຸທິດເລືອດເນື້ອ, ເຫື່ອແຮງ ເພື່ອຄວາມສະຫງົບສຸກ ຂອງປະຊາຊົນລາວບັນດາເຜົ່າຕະຫຼອດມາ. ພາຍຫຼັງທີ່ປະເທດຊາດໄດ້ຮັບການປົດປ່ອຍຢ່າງເປັນທາງການ ໃນວັນທີ 2 ທັນວາ 1975 ເປັນຕົ້ນມາ, ເຊິ່ງແມ່ນຢູ່ໃນໄລຍະປົກປັກຮັກສາ ແລະ ສ້າງສາພັດທະນາປະເທດຊາດ ເພື່ອຕອບສະໜອງກັບຄວາມຮຽກຮ້ອງຕ້ອງການຂອງສະພາບການໃໝ່, ກຳລັງປ້ອງກັນຄວາມສະຫງົບ ກໍ່ໄດ້ປັບປຸງຢ່າງຮອບດ້ານຢູ່ຂັ້ນຮາກຖານໄດ້ຈັດຕັ້ງແນວຮົບປ້ອງກັນຊາດ-ປ້ອງກັນຄວາມສະຫງົບຢູ່ຂັ້ນທ້ອງຖິ່ນຢ່າງແໜ້ນໜາ, ປັບປຸງຍົກສູງຄຸນນະພາບຂອງບັນດາກຳລັງປະກອບອາວຸດປະຊາຊົນ, ເດັດດ່ຽວທັບມ້າງທຸກກົນອຸບາຍການເຄື່ອນໄຫວມ້າງເພທຳລາຍຂອງສັດຕູ ແລະ ປົກປັກຮັກສາປະເທດຊາດໄດ້ຢ່າງໝັ້ນຄົງພ້ອມທັງມີຜົນງານຫຼາຍດ້ານຈົນມາຮອດປະຈຸບັນ.
#ໃນຕອນທ້າຍ ທ່ານ ຍັງຮຽກຮ້ອງ ໃຫ້ຄະນະພັກ-ຄະນະບັນຊາ, ນາຍ ແລະ ພົນຕໍາຫຼວດ ເອົາໃຈໃສ່ເສີມຂະຫຍາຍທາດແທ້ຂອງກໍາລັງ ປກສ ປະຊາຊົນ, ເພີ່ມທະວີການຈັດຕັ້ງປະຕິບັດແນວທາງປ້ອງກັນຊາດ - ປ້ອງກັນຄວາມສະຫງົບ ທົ່ວປວງຊົນຮອບດ້ານຂອງພັກ ໃຫ້ມີທັງປະລິມານ ແລະ ຄຸນນະພາບ, ມີຜົນສໍາເລັດຕາມຄາດ ໝາຍ; ຕັ້ງໜ້າແກ້ໄຂປາກົດການຫຍໍ້ທໍ້ທີ່ເກີດຂຶ້ນໃນຖັນແຖວການຈັດຕັ້ງ ແລະ ໃນສັງຄົມ ເພື່ອເປັນແບບຢ່າງໃຫ້ແກ່ສັງຄົມ, ຫັນລົງກໍ່ສ້າງຮາກຖານຢ່າງແຂງແຮງ; ເປັນເຈົ້າການຊອກຮູ້ກໍາແໜ້ນກົນອຸບາຍມ້າງເພທໍາລາຍຂອງສັດຕູ ແລະ ກຸ່ມຄົນບໍ່ດີ, ກໍາແໜ້ນສະພາບການສາກົນ ແລະ ພາກພື້ນ, ຊອກຮູ້ຮໍ່າຮຽນ, ກໍາແໜ້ນການເຄື່ອນໄຫວຂອງພົນລະເມືອງ; ເອົາໃຈໃສ່ຈັດຕັ້ງຜັນຂະຫຍາຍ 3 ທາດແທ້, 7 ມູນເຊື້ອ ຕາມທິດກໍ່ສ້າງ ແລະ ປັບປຸງກໍາລັງ ປກສ ປະຊາຊົນ ໃຫ້ມີຄວາມປອດໃສ, ເຂັ້ມແຂງ ແລະ ໜັກແໜ້ນ ຕື່ມອີກ.
