ວັນທີ 24 ພຶດສະພາ 2024 ທີ່ສະໂມສອນໃຫຍ່ຂອງແຂວງ, ຄະນະໂຄສະນາອົບຮົມແຂວງສາລະວັນ ໄດ້ຈັດພິທີລະນຶກ 3 ວັນສໍາຄັນປະຫວັດສາດ ຂອງຊາດ ຂອງສາກົນຄື: ວັນເກີດ ປະທານ ໂຮ່ຈິມິນ ຄົບຮອບ 134 ປີ ( 19/5/1890 – 19/5/2024 ), ວັນຜ່າວົງປິດລ້ອມ ຂອງກອງພັນທີ 2 ວິລະຊົນທົ່ງໄຫຫີນຊຽງຂວາງ ຄົບຮອບ 65 ປີ ( 24/5/1960-24/5/2024 ) ແລະ ວິລະກໍາໂຕນຄຸກ ຢ່າງມະຫັດສະຈັນ ຂອງຜູ້ນໍາພັກ ແລະ ແນວລາວຮັກຊາດ ຄົບຮອບ 64 ປີ ( 18/5/1959-18/5/1959 ) ໃຫ້ກຽດເຂົ້າຮ່ວມຮັບຟັງມີບັນດາທ່ານ ຄະນະປະຈໍາພັກແຂວງ, ກໍາມະການພັກແຂວງ, ນາຍແລະ ພົນທະຫານ, ນາຍ ແລະ ພົນຕໍາຫຼວດ, ຫົວໜ້າ ແລະ ຮອງຫົວໜ້າພະແນກການ, ພະນັກງານ-ຫຼັກແຫຼ່ງ, ພະນັກງານ-ລັດຖະກອນ ອ້ອມຂ້າງແຂວງ ເຂົ້າຮ່ວມ.
ໃນພິທີ ທ່ານ ບົວທອງ ຄຸນຍອດປັນຍາ ອາດີດຮອງເລຂາພັກແຂວງ ໄດ້ໃຫ້ກຽດເລົ່າຄືນວັນເກີດວັນຄ້າຍວັນເກີດປະທານ ໂຮ່ຈີມິນ ຄົບຮອບ 134 ປີ ທ່ານ ໃຫ້ຮູ້ວ່າ: ປະທານ ໂຮ່ຈີມິນ ເກີດເມື່ອວັນທີ 19 ພຶດສະພາ 1890 ແລະ ເສຍຊີວິດໃນວັນທີ 8 ກັນຍາ 1969 ເພິ່ນເປັນວິລະບຸລຸດ ແລະ ບິດາທີ່ເຄົາລົບຮັກ ຂອງປະຊາຊົນຫວຽດນາມ ຜູ້ນໍາໃຊ້ລັດທິຮັກຊາດປະສົມປະສານກັບລັດທິສັງຄົມນິຍົມ, ຜູ້ສ້າງຕັ້ງພັກຄອມມູນິດອິນດູຈີນ (ປັດຈຸບັນແມ່ນພັກຄອມມຸນິດຫວຽດນາມ) ແລະ ເຄື່ອນໄຫວເພື່ອກອບກູ້ເອົາເອກະລາດໃນປີ 1941, ເປັນປະທານປະເທດ ສາທາລະນະລັດ ປະຊາທິປະໄຕ ຫວຽດນາມ ນັບແຕ່ປີ 1945-1969, ເປັນໜຶ່ງໃນຜູ້ນຳການເຄື່ອນໄຫວ ໃນການຕໍ່ຕ້ານລັດທິຫົວເມືອງຂຶ້ນແບບເກົ່າ ແລະ ແບບໃໝ່, ຫລັງສົງຄາມໂລກຄັ້ງທີ II ເພິ່ນໄດ້ເປັນໜຶ່ງໃນບັນດາຜູ້ນຳລັດທິຄອມມຸນິດ ທີ່ມີອິດທິພົນທີ່ສຸດໃນສະຕະວັດທີ XX.
ຈາກນັ້ນ, ທ່ານ ຍັງໃຫ້ກຽດເລົ່າຄືນວິລະກໍາໂຕນຄຸກ ຢ່າງມະຫັດສະຈັນ ຂອງຜູ້ນໍາພັກ ແລະ ແນວລາວຮັກຊາດ ຄົບຮອບ 64 ປີ ທ່ານ ກ່າວວ່າ: ເມື່ອຫວນຄືນອະດີດ 64 ປີຄືນຫຼັງ, ໄດ້ມີເຫດການປະຫວັດສາດ ທີ່ປວງຊົນລາວ ທັງຊາດ ບໍ່ອາດຫລົງລືມໄດ້ ນັ້ນກໍ່ຄື: ວິລະກຳໂຕນຄຸກ ຢ່າງມະຫັດສະຈັນ ຂອງບັນດາຜູ້ນຳ ແລະ ພະນັກງານ ແນວລາວຮັກຊາດ ຈໍານວນ 16 ທ່ານ ຄື: ສະຫາຍ ສຸພານຸວົງ, ສະຫາຍ ໝູຮັກ ພູມສະຫວັນ, ສະຫາຍ ພູມີ ວົງວິຈິດ, ສະຫາຍ ພູນ ສີປະເສີດ, ສະຫາຍ ສີຊະນະ ສີສານ, ສະຫາຍ ຄຳຜາຍ ບຸບຜາ, ສະຫາຍ ສີທົນ ກົມມະດຳ, ສະຫາຍ ສິງກະໂປ ສີໂຄດຈຸນລະມະນີ, ສະຫາຍ ມາ ໄຂຄຳພິທູນ, ສະຫາຍ ໝື່ນ ສົມວິຈິດ, ສະຫາຍ ເພົ້າ ພິມພະຈັນ, ສະຫາຍ ຄຳເພັດ ພົມມະວັນ, ສະຫາຍ ມະຫາ ສົມບູນ ວົງໜໍ່ບຸນທຳ, ສະຫາຍ ບົວສີ ຈະເລີນສຸກ, ທ້າວ ພູເຂົາ ແລະ ທ້າວ ມານະ.ໃນຂ້ອນຄືນ ຂອງວັນທີ 23 ພຶດສະພາ 1960, ເວລາ 24 ໂມງ 30 ນາທີ ຫລື ເວລາ 0 ໂມງ 30 ນາທີ ຂອງວັນທີ 24 ພຶດສະພາ 1960 ຜູ້ນຳພັກ-ແນວລາວຮັກຊາດ ໄດ້ໂຕນໜີ ອອກຈາກຄຸກໂພນເຄັງ ໄປສູ່ເຂດທີ່ໝັ້ນ ຂອງການປະຕິວັດ ດ້ວຍຄວາມປອດໄພທຸກປະການ.
ໃນຕອນທ້າຍ, ທ່ານ ພົນຈັດຕະວາ ອ໋ອດ ໄຊຍະວົງ ອາດີດຄະນະປະຈຳພັກແຂວງ, ຫົວໜ້າກອງບັນຊາການທະຫານແຂວງ ໄດ້ເລົ່າຄືນມູນເຊື້ອວັນວັນຜ່າວົງປິດລ້ອມ ຂອງກອງພັນທີ 2 ວິລະຊົນທົ່ງໄຫຫີນຊຽງຂວາງ ຄົບຮອບ 65 ປີ ທ່ານໄດ້ກ່າວວ່າ: ໃນຄໍ່າຄືນວັນທີ 18 ພຶດສະພາ 1959 ຄະນະບັນຊາກອງພັນທີ 2 ພາຍໃຕ້ການຊີ້ນໍາຂອງສູນກາງພັກ ໄດ້ໃຊ້ກົນອຸບາຍຫຼອກສັດຕູ ໂດຍໃຊ້ຄວາມມືດໃນການຖອນທັບ ໄປທາງທິດຕາເວັນຕົກສຽງໃຕ້ ມຸ່ງໜ້າຫາເຂດບ້ານໂຕນນາແຖງໜອງຕິ້ວ ແລ້ວເຂົ້າປ່າໄປຕາມເສັ້ນທາງຫາບ້ານມາຍຢ່າງປິດລັບ ຊຶ່ງໃນຕອນເຊົ້າຂອງວັນທີ 19 ພຶດສະພາ 1959 ສັດຕູບຸກເຂົ້າປົດອາວຸດກອງພັນທີ 2 ແຕ່ພວກເຂົາຕົກສະເງີ້ ເພາະຢູ່ໃນຄ້າຍມີແຕ່ຄວາມມິດງຽບ ແລະ ຫວ່າງເປົ່າ ພວກສັດຕູເຈັບແຄ້ນແໜ້ນໃຈ ແລະ ໄດ້ຮີບຮ້ອນໃຫ້ທຸກກໍາລັງໄລ່ຕາມຫວັງດັບສູນກອງພັນທີ 2 ແຕ່ບໍ່ສາມາດຕິດຕາມໄດ້ທັນ ໃນການເຄື່ອນທັບ 10 ກວ່າວັນ ກອງພັນທີ 2 ໄດ້ສູ້ຮົບກັບສັດຕູທັງນ້ອຍ ແລະ ໃຫຍ່ 10 ຄັ້ງ ສຸດທ້າຍກອງພັນທີ 2 ພ້ອມກັບ 91 ຄອບຄົວໄດ້ຜ່າວົງປິດລ້ອມທີ່ໜາແໜ້ນຂອງສັດຕູໄປສູ່ເຂດທີ່ໝັ້ນຂອງການປະຕິວັດດ້ວຍຄວາມປອດໄພ.
ພິທີຄັ້ງນີ້ ໄດ້ດໍາເນີນໄປເປັນເວລາ 1 ຄາບ ຈິ່ງອັດລົງດ້ວຍຜົນສໍາເລັດຢ່າງຈົບງາມ.
