ຄະນະໂຄສະນາອົບຮົມແຂວງສາລະວັນ ແລກປ່ຽນບົດຮຽນວຽກງານໂຄສະນາ-ອົບຮົມ ກັບຄະນະໂຄສະນາສຶກສາພັກ ແຂວງເທື່ອທຽນເຫ້ວ
ສສ ຫວຽດນາມ.
ໃນວັນທີ 26 ກໍລະກົດ 2024 ຄະນະໂຄສະນາອົບຮົມແຂວງສາລະວັນ ໄດ້ຈັດພິທີພົບປະແລກປ່ຽນບົດຮຽນວຽກງານໂຄສະນາອົບຮົມ ຮ່ວມກັບຄະນະໂຄສະນາສຶກສາພັກ ແຂວງເທື່ອທຽນເຫັວ ສສ ຫວຽດນາມ ຂື້ນທີ່ຫ້ອງປະຊຸມ ຂອງຫ້ອງວ່າການແຂວງ ເຊິ່ງໃຫ້ກຽດເຂົ້າຮ່ວມໃນພິທີພົບປະແລກປ່ຽນບົດຮຽນ ປະກອບມີ ສອງຝ່າຍຄື: ຝ່າຍຄະນະຜູ້ແທນ ຄະນະໂຄສະນາສຶກສາພັກແຂວງ ເທື່ອທຽນເຫວ້ ສສ ຫວຽດນາມ ນໍາໂດຍ ທ່ານ ຮ່ວງ ແຂັງ ຮຸ່ງ ຄະນະປະຈຳພັກແຂວງ, ຫົວໜ້າຄະນະໂຄສະນາສຶກສາພັກແຂວງ ເທື່ອທຽນເຫວ້ ພ້ອມດ້ວຍຄະນະ ແລະ ຝ່າຍຄະນະຜູ້ແທນ ຄະນະໂຄສະນາອົບຮົມແຂວງສາລະວັນ ນໍາໂດຍ ທ່ານ ຈັນສະໝອນ ພົມມະແສງ, ຄະນະປະຈຳພັກແຂວງ, ຫົວໜ້າຄະນະໂຄສະນາອົບຮົມແຂວງສາລະວັນ ພ້ອມດ້ວຍຄະນະ.
ໃນພິທີພົບປະ, ທັງສອງຝ່າຍໄດ້ລາຍງານ ໃຫ້ກັນຊາບກ່ຽວກັບສະພາບການພັດທະນາເສດຖະກິດ-ສັງຄົມ, ຜົນສໍາເລັດຂອງການຮ່ວມມືລະຫວ່າງສອງແຂວງ ເທື່ອທຽນເຫ້ວ-ສາລະວັນ, ກໍ່ຄືຜົນສໍາເລັດຂອງການເຄື່ອນໄຫວວຽກງານໂຄສະນາສຶກສາ-ໂຄສະນາອົບຮົມໃນໄລຍະຜ່ານມາ ຂອງແຕ່ລະແຂວງ ພ້ອມທັງຕີລາຄາຜົນການຮ່ວມມືໃນປີຜ່ານມາ ແລະ ປຶກສາຫາລື ກ່ຽວກັບທິດທາງແຜນການຮ່ວມມືໃນຕໍ່ໜ້າ.
ສອງຝ່າຍມີຄວາມປິຕິຍິນດີເປັນຢ່າງສູງ ທີ່ໄດ້ຮັບຮູ້ວ່າ ສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງຊາດ ລາວ-ຫວຽດນາມ ເວົ້າລວມ; ເວົ້າສະເພາະ ລະຫວ່າງ ສອງແຂວງ ເທື່ອທຽນເຫວ້-ສາລະວັນ ໃນໄລຍະໃໝ່ ນັບມື້ໄດ້ຮັບການເພີ່ມພູນຄູນສ້າງ ແລະ ພັດທະນາຂື້ນເທື່ອລະກ້າວ.
ເພື່ອຕອບສະໜອງຄວາມຮຽກຮ້ອງຕ້ອງການໃນການພັດທະນາໄລຍະຕໍ່ໜ້າ, ໂດຍສະເພາະ ແມ່ນການປະກອບສ່ວນເພີ່ມທະວີການຮ່ວມມື, ຊ່ວຍເຫຼືອເຊິ່ງກັນ ແລະ ກັນ ລະຫວ່າງຄະນະໂຄສະນາສືກສາພັກແຂວງເທື່ອທຽນເຫວ້ ກັບຄະນະໂຄສະນາອົບຮົມແຂວງສາລະວັນ, ສອງຝ່າຍໄດ້ເປັນເອກະພາບຮ່ວມກັນໃນບາງບັນຫາ ທີ່ຈຳເປັນຕ້ອງໄດ້ຮ່ວມມືກັນ ໃນໄລຍະຕໍ່ໜ້າ, ດັ່ງນີ້ :
1.ສືບຕໍ່ແລກປ່ຽນຂໍ້ມູນຂ່າວສານ, ເພີ່ມທະວີການຮ່ວມມື, ຊ່ວຍເຫຼືອເຊິ່ງກັນ ແລະ ກັນ ແລະ ປະສານສົມທົບກັນ ໃນການເຄື່ອນໄຫວວຽກງານໂຄສະນາ ລະຫວ່າງຄະນະໂຄສະນາສຶກສາພັກແຂວງເທື່ອທຽນເຫວ້ ກັບ ຄະນະໂຄສະນາອົບຮົມແຂວງສາລະວັນ ເປັນຕົ້ນ: ແລກປ່ຽນບົດຮຽນ, ປະສົບການທາງດ້ານວິຊາສະເພາະ, ກໍ່ສ້າງ ຊັບພະຍາກອນມະນຸດ ແລະ ຊ່ວຍເຫຼືອອຸປະກອນຮັບໃຊ້ ຕາມທ່າແຮງຂອງຕົນ.
2.ສືບຕໍ່ຍູ້ແຮງ ແລະ ຫັນວຽກງານໂຄສະນາ, ສຶກສາອົບຮົມ ໃນຖັນແຖວພະນັກງານ, ສະມາຊິກພັກ, ກຳລັງປະກອບອາວຸດ ແລະ ປະຊາຊົນຂອງສອງແຂວງ ໃຫ້ມີຄວາມຫຼາກຫຼາຍ ແນໃສ່ຍົກລະດັບຄວາມຮັບຮູ້ເຂົ້າໃຈກ່ຽວກັບສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ລະຫວ່າງສອງຊາດ ລາວ-ຫວຽດນາມ ເວົ້າລວມ, ເວົ້າສະເພາະ ກໍ່ແມ່ນລະຫວ່າງສອງແຂວງ ສາລະວັນ-ເທື່ອທຽນເຫວ້ ໃຫ້ເລິກເຊິ່ງຍິ່ງກວ່າເກົ່າ, ໂດຍສະເພາະ ເນື່ອງໃນໂອກາດວັນຊາດຫວຽດນາມ, ວັນຊາດລາວ, ວັນສ້າງຕັ້ງການພົວພັນທາງ ການທູດ ຫວຽດນາມ-ລາວ (ວັນທີ 05 ກັນຍາ) ແລະ ວັນເຊັນສົນທິສັນຍາມິດຕະພາບ ແລະ ການຮ່ວມມື ລະຫວ່າງ ຫວຽດນາມ-ລາວ (ວັນທີ 18 ກໍລະກົດ), ວັນຄ້າຍວັນເກີດ ປະທານ ໂຮ່ຈິມິນ, ປະທານ ໄກສອນ ພົມວິຫານ, ປະທານ ສຸພານຸວົງ..
ສອງຝ່າຍ ສືບຕໍ່ຊຸກຍູ້, ສະໜັບສະໜູນ ແລະ ໂຄສະນາເຜີຍແຜ່ກ່ຽວກັບຜົນສໍາເລັດ ຂອງການຈັດຕັ້ງ ປະຕິບັດບັນດາເນື້ອໃນຂໍ້ຕົກລົງ ລະຫວ່າງການນໍາຂັ້ນສູງພັກກອມມູນິດຫວຽດນາມ ແລະ ພັກປະຊາຊົນ ປະຕິວັດລາວ, ບົດບັນທຶກຊ່ວຍຈໍາ ວ່າດ້ວຍການຮ່ວມມື ລະຫວ່າງແຂວງສາລະວັນ ແລະ ແຂວງເທື່ອທຽນເຫົວ ໄລຍະ 2022 – 2026. ສອງຝ່າຍ ສືບຕໍ່ປຸກລະດົມຂົນຂວາຍພະນັກງານ, ສະມາຊິກພັກ ແລະ ປະຊາຊົນບັນດາເຜົ່າ ພ້ອມກັນຈັດຕັ້ງປະຕິບັດ, ຜັນຂະຫຍາຍບັນດາເນື້ອໃນການຮ່ວມມືດັ່ງກ່າວໃຫ້ໄດ້ຮັບຜົນສໍາເລັດ.
3.ສອງຝ່າຍເຫັນດີເປັນເອກະພາບກັນ ຈັດຕັ້ງການແລກປ່ຽນຄະນະຜູ້ແທນ ເຊິ່ງນໍາໂດຍ ສະຫາຍຫົວ ໜ້າ ຫຼື ຮອງຫົວໜ້າຄະນະໂຄສະນາສຶກສາພັກແຂວງ ແລະ ຄະນະໂຄສະນາອົບຮົມແຂວງເປັນຫົວໜ້າຄະນະ ໄປຢ້ຽມຢາມ, ແລກປ່ຽນບົດຮຽນ ແລະ ວາງອອກທິດທາງແຜນການຮ່ວມມືໃນຕໍ່ໜ້າ ໂດຍກຳນົດເປົ້າໝາຍ ຄະນະ ຜູ້ແທນແຕ່ 7 ຫາ 10 ສະຫາຍ, ກຳນົດເວລາ 03 ວັນ.
ໃນກໍລະນີທີ່ສອງຝ່າຍ ບໍ່ສາມາດດໍາເນີນການແລກປ່ຽນຄະນະຜູ້ແທນ ຕາມກຳນົດເວລາທີ່ວາງໄວ້ແບບ ເຊິ່ງໜ້າ, ແມ່ນຈະປະຕິບັດການແຈ້ງ, ແລກປ່ຽນຂໍ້ມູນໃຫ້ກັນຊາບ ແລະ ດໍາເນີນກອງປະຊຸມໃນຮູບແບບກອງ ປະຊຸມທາງໄກ (ອອນລາຍ).
4.ສອງຝ່າຍໄດ້ເຫັນດີເປັນເອກະພາບກັນວ່າ ຕ້ອງໄດ້ຊຸກຍູ້ການພົວພັນຮ່ວມມື ໃຫ້ນັບມື້ນັບກ້າວໄປສູ່ ລວງເລິກ. ນອກຈາກການແລກປ່ຽນຄະນະຜູ້ແທນແລ້ວ, ກໍ່ອາດຈະສົມທົບກັນ ຄົ້ນຄວ້າສ້າງຕັ້ງ ແລະ ຜັນ ຂະຫຍາຍບັນດາກົນໄກຮ່ວມມື ເຊັ່ນ: ກອງປະຊຸມທາງໄກ (ອອນລາຍ) ເພື່ອລາຍງານກ່ຽວກັບສະພາບການ, ສໍາມະນາດ້ານທິດສະດີ, ແລກປ່ຽນບົດຮຽນດ້ານພຶດຕິກຳຕົວຈິງ, ພິມຈຳໜ່າຍເອກະສານໂຄສະນາ… ໃນກໍລະນີ ມີບັນຫາໃໝ່ເກີດຂຶ້ນ ແລະ ເຫັນວ່າມີຄວາມຈໍາເປັນຮີບດ່ວນ, ສອງຝ່າຍຈະປຶກສາຫາລື ແລະ ແຈ້ງໃຫ້ກັນຊາບ ເພື່ອດໍາເນີນການພົບປະ, ແລກປ່ຽນຄໍາຄິດຄໍາເຫັນ ແລະ ຈັດຕັ້ງຜັນຂະຫຍາຍໄດ້ຢ່າງທັນການ.
5.ສອງຝ່າຍໄດ້ຕົກລົງເຫັນດີເປັນເອກະພາບຮ່ວມກັນ ໃນການຈັດກອງປະຊຸມພົບປະຄັ້ງຕໍ່ໄປ, ແມ່ນ ຄະນະໂຄສະນາສຶກສາພັກແຂວງເທື່ອທຽນເຫວ້ ເປັນເຈົ້າພາບ, ຄາດຄະເນໃນຊ່ວງເຄິ່ງກາງຂອງທ້າຍປີ 2025 ຄະນະໂຄສະນາສຶກສາພັກແຂວງເທື່ອທຽນເຫວ້ ຮຽນເຊີນ ຄະນະໂຄສະນາອົບຮົມແຂວງສາລະວັນ ເດີນທາງໄປຢ້ຽມຢາມ ແລະ ເຮັດວຽກຢ່າງເປັນທາງການຢູ່ແຂວງ ເທື່ອທຽນເຫວ້ (ສໍາລັບວັນ, ເວລາ ລະອຽດສອງຝ່າຍຈະປຶກສາຫາລື, ເປັນເອກະພາບກັນພາຍຫຼັງ ແລະ ລາຍງານໃຫ້ກັນຊາບກ່ອນລ່ວງໜ້າກອງປະຊຸມ 30 ວັນ).
ໃນຕອນທ້າຍ ຂອງພິທີທັງສອງຝ່າຍຮ່ວມກັນລົງນາມເຊັນບົດບັນທຶກຄວາມຊົງຈໍາ.
