ໜ່ວຍພັກຮາກຖານຄະນະໂຄສະນາອົບຮົມແຂວງສາລະວັນ ດໍາເນີນຊີວິດການເມືອງ ທ້າຍສະໄໝທີ IV ຕິດພັນກັບການທາບທາມບຸກຄະລາກອນ
ເຂົ້າໂຄງປະກອບ ຮອບທີ II
ໃນຕອນເຊົ້າວັນທີ 25 ກຸມພາ 2025 ນີ້ ທີ່ຫ້ອງປະຊຸມຄະນະໂຄສະນາອົບຮົມແຂວງ ໜ່ວຍພັກຮາກຖານຄະນະໂຄສະນາອົບຮົມແຂວງສາລະວັນ ໄດ້ດໍາເນີນຊີວິດການເມືອງທ້າຍສະໄໝທີ IV ຕິດພັນກັບການທາບທາມບຸກຄະລາກອນເຂົ້າໂຄງປະກອບຮອບທີ II ກອງປະຊຸມດັ່ງກ່າວ ໂດຍພາຍໃຕ້ການເປັນປະທານຂອງ ສະຫາຍ ຈັນສະໝອນ ພົມມະແສງ ຄະນະປະຈໍາພັກແຂວງ, ຫົວໜ້າຄະນະໂຄສະນາອົບຮົມແຂວງ, ໂດຍມີ ສະຫາຍ ຄໍາພູນ ຈັນທະລາດ ເລຂາໜ່ວຍພັກຮາກຖານ, ຮອງຫົວໜ້າຄະນະໂຄສະນາອົບຮົມແຂວງ, ພ້ອມດ້ວຍບັນດາສະຫາຍຮອງເລຂາໜ່ວຍພັກ, ຄະນະໜ່ວຍພັກ, ສະມາຊິກພັກ ພາຍໃນໜ່ວຍພັກຮາກຖານຄະນະໂຄສະນາອົບຮົມແຂວງ ແລະ ແຂກທີ່ຖືກເຊີນ ຈາກພາກສ່ວນທີ່ກ່ຽວເຂົ້າຮ່ວມ.
ໃນກອງປະຊຸມ ໄດ້ຜ່ານມະຕິຕົກລົງ ສະບັບເລກທີ 258/ຄຈພຂ,ສວ, ລົງວັນທີ 12/2/2025 ວ່າດ້ວຍ: ອະນຸມັດໃຫ້ໜ່ວຍພັກຄະນະໂຄສະນາອົບຮົມແຂວງສາລະວັນ ເປີດກອງປະຊຸມດໍາເນີນຊີວິການເມືອງ ທ້າຍສະໄໝທີ IV ຈາກນັ້ນ, ໃນກອງປະຊຸມໄດ້ເຊື່ອມຊຶມຄໍາແນະນໍາຂອງຄະນະກວດກາພັກແຂວງ ເລກທີ 225/ຄກພຂ, ລົງວັນທີ 22 ພະຈິກ 2023 ກ່ຽວກັບການກະກຽມ ແລະ ດໍາເນີນຊີວິດການເມືອງທ້າຍສະໄໝ ເພື່ອກ້າວເຂົ້າສູ່ກອງປະຊຸມໃຫ່ຍ 3 ຂັ້ນຂອງພັກ. ໃນກອງປະຊຸມ ຍັງໄດ້ເຊື່ອມຊຶມເອກະສານ 3 ບົດ ຄື: ຮໍ່າຮຽນເອົາແບບແຜນວິທີເຮັດວຽກ ແລະ ຄຸນສົມບັດສິນທໍາປະຕິວັດ ຂອງປະທານໄກສອນ ພົມວິຫານ; ຝຶກຝົນຫຼໍ່ຫຼອມຄຸນທາດການເມືອງ, ຄຸນສົມບັດສະທໍາປະຕິວັດ ຂອງພະນັກງານ, ສະມາຊິກພັກ ແລະ ເອກະສານມາດຖານຂອງພະນັກງານ, ສະມາຊິກພັກ ໃນເງືື່ອນໄຂໃໝ່. ຈາກນັ້ນ, ໄດ້ຜ່ານຮ່າງລາຍງານການເມືອງ, ແຜນພັດທະນາ, ບົດສຳຫຼວດການນຳພາລວມ ແລະ ຜ່ານບົດສໍາຫຼວດບຸກຄົນພາຍໃນໜ່ວຍພັກ ຕາມລຳດັບ ເຊິ່ງໂດຍລວມບັ້ນດຳເນີນຊີວິດການເມືອງ ບັນດາສະຫາຍ ໄດ້ມີຄວາມຮັບຜິດຊອບສູງ ຍົກໃຫ້ເຫັນດ້ານດີທີ່ຕັ້ງໜ້າ ໃນໄລຍະຜ່ານມາ ແລະ ກ້າຍົກຂໍ້ຂາດຕົກບົກຜ່ອງຕົນເອງ ເພື່ອໃຫ້ໝູ່ຄະນະຊ່ວຍເຫຼືອກັນ ຢ່າງກົງໄປກົງມາ, ການຕໍານິສົ່ງຂ່າວຊ່ວຍເຫຼືອເຊີ່ງກັນ ແລະ ກັນ ມີລັກສະນະສ້າງສັນ ແລະ ເປັນຂະບວນຟົດຟື້ນ ຈິງໃຈໃນການຊ່ວຍເຫຼືອ ເພື່ອນໍາໄປປັບປຸງແກ້ໄຂໃຫ້ດີຂຶ້ນໃນຕໍ່ໜ້າ.
ຈາກນັ້ນ ສະຫາຍ ຈັນສະໝອນ ພົມມະແສງ ໄດ້ຂື້ນຜ່ານເອກະສານມາດຖານ, ເງື່ອນໄຂ ຂອງຜູ້ທີ່ຈະສະໝັກເລືອກເປັນເລຂາ-ຮອງເລຂາ, ປະທານ ແລະ ຮອງປະທານກວດກາ ຂອງໜ່ວຍພັກ, ພ້ອມນີ້ ໃນກອງປະຊຸມຍັງໄດ້ຮັບຟັງທິດຊີ້ນຳ ຂອງສະຫາຍ ປະທານຕື່ມອີກ ຫຼັງຈາກນັ້ນ, ກໍ່ໄດ້ດໍາເນີນການປ່ອນບັດທາບທາມຮອບ II.
ຈຸດປະສົງ ກໍເພື່ອຕີລາຄາລວມ ຜົນຂອງການປະຕິບັດໜ້າທີ່ການເມືອງ, ຝຶກຝົນຫຼໍ່ຫຼອມຕົນເອງ, ບຸກຄົນໃນຄະນະພັກ, ສະມາຊິກພັກ ເພື່ອໃຫ້ເຫັນດ້ານດີ, ດ້ານອ່ອນ, ຂໍ້ຄົງຄ້າງ ແລະ ສາມາດຖອດຖອນບົດຮຽນໄດ້, ສືບຕໍ່ຜັນຂະຫຍາຍຜົນ ຂອງການດໍາເນີນຊີວິດການເມືອງສະ ໄໝຜ່ານມາ ໂດຍສຸມໃສ່ແກ້ ໄຂຈຸດອ່ອນຂໍ້ຄົງຄ້າງ ຂອງການຈັດຕັ້ງພັກ, ບຸກຄົນໃນຄະນະພັກ, ສ້າງການຫັນປ່ຽນຢ່າງເລິກເຊິ່ງໃນການຕີລາຄາແບ່ງປະເພດ, ຄຸນນະພາບຂອງການຈັດຕັ້ງພັກ, ບຸກຄົນຄະນະພັກ, ບຸກຄົນສະມາຊິກພັກ ໂດຍສ່ອງແສງຖືກຕ້ອງ, ສອດຄ່ອງກັບການຫັນປ່ຽນວຽກງານຕົວຈິງ, ສາມາດສ້າງພື້ນຖານ ແລະ ປັດໄຈອັນໃໝ່ໃຫ້ແກ່ການຈັດຕັ້ງພັກ, ຄະນະພັກ, ບຸກຄົນສະມາຊິກພັກ ມີການຫັນປ່ຽນຢ່າງຕັ້ງໜ້າໃນດ້ານແບບແຜນການນໍາພາ, ແບບແຜນວິທີເຮັດວຽກ, ມີຄວາມສາມັກຄີເປັນເອກະພາບ, ຄວາມເປັນເຈົ້າບຸກບືນເຮັດແທ້ທຳຈິງ.