ສາລະວັນ ຈັດງານສັບປະດາແຫ່ງຊາດ ດ້ານຄວາມປອດໄພທາງຫຼວງ ຕິດພັນກັບການສະເຫຼີມສະຫຼອງວັນກໍາມະກອນສາກົນ ຄົບຮອບ 140 ປີ
ວັນທີ 24 ເມສານີ້, ພະແນກໂຍທາທິການ ແລະ ຂົນສົ່ງແຂວງ ສົມທົບກັບ ສະຫະພັນກໍາມະບານ ແຂວງສາລະວັນ ຈັດງານສັບປະດາແຫ່ງຊາດ ດ້ານຄວາມປອດໄພທາງຫຼວງ ປະຈໍາປີ 2026 ຕິດພັນກັບການສະເຫຼີມສະຫຼອງວັນກໍາມະກອນສາກົນ ຄົບຮອບ 140 ປີ ( 1 ພຶດສະພາ 1886 – 1 ພຶດສະພາ 2026) ຂື້ນຢູ່ທີ່ສະໂມສອນຂອງແຂວງ, ໂດຍການເຂົ້າຮ່ວມຂອງ ທ່ານ ດາວວົງ ພອນແກ້ວ ກຳມະການສູນກາງພັກ ເລຂາຄະນະບໍລິຫານງານພັກແຂວງ, ປະທານສະພາປະຊາຊົນແຂວງ; ມີບັນດາຮອງເລຂາພັກແຂວງ, ຄະນະປະຈຳພັກແຂວງ, ກຳມະການພັກແຂວງ, ຫົວໜ້າພະແນກ, ຮອງຫົວໜ້າພະແນກ, ອົງການທຽບເທົ່າ, ບັນດາທ່ານຄະນະກຳມະການດ້ານຄວາມປອດໄພທາງຫຼວງຂັ້ນແຂວງ; ພະ ນັກງານ, ທະຫານ, ຕຳຫຼວດ, ນັກຮຽນ-ນັກສຶກສາ, ກຳມະກອນ, ຊາວຜູ້ອອກແຮງານ ຕະຫຼອດຮອດພໍ່ແມ່ປະຊາຊົນ 5 ບ້ານເທດສະບານເຂົ້າຮ່ວມ.
ການຈັດງານສັບປະດາແຫ່ງຊາດ ເປັນກິດຈະກຳໜຶ່ງ ທີ່ສະແດງໃຫ້ເຫັນເຖີງຄວາມເປັນຫ່ວງເປັນໄຍ, ຄວາມເອົາໃຈໃສ່ ແລະ ຄວາມຮັບຜິດຊອບຂອງແຂວງ ຕໍ່ວຽກງານຄວາມປອດໄພທາງຫຼວງ, ທັງເປັນການຈັດຕັ້ງປະຕິບັດ ກົດໝາຍ ວ່າດ້ວຍ: ການຈະລາຈອນທາງບົກ, ຍຸດທະສາດແຫ່ງຊາດດ້ານຄວາມປອດໄພທາງຫຼວງ ແລະ ມະຕິຂອງອົງການສະຫະປະຊາຊາດ ກ່ຽວກັບການປັບປຸງຄວາມປອດໄພທາງຫຼວງໃນທົ່ວໂລກ ເພື່ອໂຄສະນາ, ສ້າງສະຕິ ແລະ ປູກຈິດສໍານຶກໃຫ້ປະຊາຊົນທຸກຊັ້ນຄົນທົ່ວສັງຄົມ ເຫັນໄດ້ໄພອັນຕະລາຍຂອງການລະເມີດກົດຈະລາຈອນ ເປັນຕົ້ນ: ການຂັບຂີ່ລົດໄວ, ການດື່ມສິ່ງມຶນເມົາແລ້ວຂັບ ເປັນສາເຫດສ່ວນໃຫຍ່ໃນການເກີດອຸບັດເຫດ; ເຫັນໄດ້ຜົນກະທົບ ແລະ ຜົນສະທ້ອນຂອງການເກີດອຸບັດເຫດຕໍ່ການດໍາລົງຊີວິດຂອງຄົນໃນສັງຄົມ, ຕໍ່ເສດຖະກິດ ແລະ ການພັດທະນາ.
ວັນກຳມະກອນສາກົນ ກໍ່ເປັນອີກວັນໜຶ່ງທີ່ມີຄວາມໝາຍສໍາຄັນຕໍ່ກັບກຳມະກອນສາກົນ ກໍຄື ຊົນຊັ້ນກຳມະກອນລາວ, ໃນປະຈຸບັນສະພາບການຂອງໂລກ ແລະ ພາກພື້ນ ໄດ້ມີການຜັນແປຢ່າງສົບສົນ ເວົ້າສະເພາະ ແມ່ນເຂດອາຊີປາຊີຟິກ ໄດ້ມີຫຼາຍບັນຫາເກີດຂຶ້ນເປັນຕົ້ນ: ບັນຫາຄວາມຂັດແຍ່ງ, ບັນຫາເສດຖະກິດ-ສັງຄົມ ຈຶ່ງເຮັດໃຫ້ຜູ້ອອກແຮງານໃນທົ່ວໂລກ ກໍຄືຊົນຊັ້ນກຳມະກອນລາວ ໄດ້ຮັບຜົນກະທົບໃນຫຼາຍດ້ານເຊັ່ນ: ການກົດຂີ່ຂູດຮີດທາງດ້ານແຮງານ, ລາຍຮັບຕໍ່າ, ຄ່າຄອງຊີບເພີ້ມຂຶ້ນສູງ ສົ່ງຜົນກະທົບຕໍ່ການດຳລົງຊີວິດຂອງກຳມະກອນ ແລະ ຜູ້ອອກແຮງານໃນທົ່ວໂລກ, ຜູ້ອອກແຮງງານລາວ ໂດຍສະເພາະແມ່ນການປັບປຸງຄ່າແຮງານບໍ່ທັນແທດເໝາະກັບສະພາບການປ່ຽນແປງໃໝ່ ໃນແຕ່ລະໄລຍະ ຈຶ່ງເປັນສາເຫດເຮັດໃຫ້ຜູ້ອອກແຮງານມີການເຄື່ອນຍ້າຍອອກຈາກປະເທດ ເພື່ອໄປຊອກຫາວຽກເຮັດງານທໍາຢູ່ຕ່າງປະເທດນັບມື້ຫຼາຍຂຶ້ນ. ສະນັ້ນ, ອົງການກຳມະບານ ໃນນາມເປັນອົງການຕາງໜ້າຜູ້ອອກແຮງານ ໄດ້ສົມທົບກັບຄະນະກຳມະການແຮງານແຕ່ລະຂັ້ນ ຄົ້ນຄວ້າ, ປັບປຸງຄ່າແຮງານຂັ້ນຕໍ່າໃຫ້ແກ່ຜູ້ອອກແຮງານໃນຜ່ານມາໄດ້ 10 ຄັ້ງ ໂດຍເລີ່ມຈາກ 26,000 ກີບ ຈົນເຖິງ 2,500,000 ກີບເປັນຕົ້ນມາ ເພື່ອປົກປ້ອງສິດຜົນ ປະໂຫຍດທາງດ້ານກົດໝາຍ, ຜູ້ອອກແຮງານໄດ້ເຂົ້າເຖິງການປົກປ້ອງທາງສັງຄົມ ແລະ ການປົກປ້ອງສິດທິພື້ນຖານດີຂຶ້ນເປັນກ້າວໆມາ.
ໃນຕອນທ້າຍກໍ່ໄດ້ມີການຕັດແຖບຜ້າເປີດງານຢ່າງເປັນທາງການ ພ້ອມທັງຮ່ວມຂະບວນການຍ່າງເພື່ອສຸຂະພາບໃນຈຸດທີ່ໄດ້ກຳນົດໄວ້, ພາຍໃນງານຍັງໄດ້ຈັດກິດຈະກໍາຖາມ-ຕອບ ຄວາມຮູ້ພື້ນຖານກ່ຽວກັບການຈະລາຈອນ ຕາມຖະໜົນຫົນທາງ ຕື່ມອີກ.
ພາບ-ຂ່າວ: ສ.ພະຈັນ
————————